بڕیارە لە سەرەتای مانگی داهاتوودا، قۆناغی سێیەمی جێبەجێکردنی سیستمی ئەسیکۆدا لە عێراق دەستپێبکات و لەم قۆناغەشدا چەند ڕێکارێک دەگیرێتەبەر.
بەپێی ڕاگەیەندراوی وەزارەتی دارایی عێراق، لە قۆناغی سێیەمی جێبەجێکردنی سیستمی ئەسیکۆدادا، سەرجەم کاروباری بازرگانان لە یەک پەنجەرەوە ڕاییدەکرێن و کۆی پڕۆسەی گومرگ و چاودێرییش دەکرێنە ئەلیکترۆنی.
بۆ ئەوەی ڕوونتر بین، لێرەدا قۆناغەکانتان بە کورتی بۆ ڕووندەکەینەوە:
قۆناغی یەکەم: دانانی نوێترین تەکنەلۆجیای چاودێری، تایبەت بە ڕاییکردن و چاودێریی گومرگی.
قۆناغی دووەم: فراوانکردنی چاودێریی ئەلیکترۆنی و ڕاییکردنی سەرجەم کاروبارەکان بە شێوازی ئەلیکترۆنی.
قۆناغی سێیەم: پێشکەشکردنی سەرجەم داتاکانی بازرگانان لە یەک پەنجەرەوە و هاوکات پەسەندکردنیان. (لەم قۆناغەدا کۆی پڕۆسەی چاودێریی ئەلیکترۆنی دەبێت و کەمترین دەستی مرۆڤی تێدادەبێت)، لەم بارەیەوە وەزارەتی دارایی دەڵێت، ئەوەش بۆ ئەوەیە کەمترین یاری بە نرخەکان بکرێت و داهاتیش زیادبکات.
