نوێنەری گشتیی مامۆستایانی گرێبەست، زانیاریی نوێ لەبارەی بەهەمیشەییکردنی مامۆستایانی گرێبەست دەخاتەڕوو.
عەلی ڕەئوف، نوێنەری گشتیی مامۆستایانی گرێبەست، بە تۆڕی میدیایی ئێستای ڕاگەیاند، لە ڕۆژی 5ی ئایاری 2026، حکومەتی عێراق وەڵامی داواکارییەکەمانی دایەوە کە ئەمینداری گشتیی ئەنجومەنی وەزیرانی عێراق ڕایگەیاندووە بەهەمیشەییکردنی مامۆستایانی گرێبەستی هەرێمی کوردستان لە چوارچێوەی دەسەڵاتەکانی حکومەتی فیدراڵیدایە.
وتیشی، بەگوێرەی یاسا هەر بۆشاییەکی وەزیفیی هەبێت دەبێت بە میلاک پڕبکرێتەوە، هەردوو حکومەتی عێراق و هەرێمی کوردستان بەرپرسن لە بەهەمیشەییکردنی مامۆستایانی گرێبەست و ئێمەش پێویستین بۆ وەزارەتی پەروەردە.
ئاماژەی بەوەشکرد، بۆ بەدواداچوونی زیاتر سەردانی بەغداد دەکەین و گفتوگۆیان لەگەڵ دەکەین.
