نرخی زێڕ بەهۆی لێدوانەکانی دۆناڵد ترەمپ لە بازاڕەکانی جیهاندا ناجێگیرە، سەرۆکی سەندیکای زەڕەنگەرانی سلێمانیش دەڵێت بەهۆی سەرۆکی ئەمریکاوە پێشبینییەکان بۆ نرخی ئەو کانزایە ”نایپێکن.”
دلێر تاهیر، سەرۆکی سەندیکای زەڕەنگەرانی سلێمانی لە لێدوانێکدا بە تۆڕی میدیایی ئێستای ڕاگەیاند، نرخی زێڕ بەشێوەیەکە ”ئێمەش سەری لێدەرناکەین و لە ئەزموونی ئێمە بەدەرە” دەشڵێت، لێدوانێکی دۆناڵد ترەمپ نرخی زێڕ بەرزدەکاتەوە یان دادەبەزێت.
ئاماژەی بەوەشدا، بۆچوونەکان سەبارەت بە ئاییندەی زێڕ نایپیکن، دۆناڵد ترەمپ قسەیەک دەکات و نرخ دادەبەزێت، یان بەرزدەبێتەوە، وتیشی بە هەموو پێوەرەکان دەبێت نرخی زێڕ بەرزدەبێتەوە، بەڵام ئێستا دابەزیوە.
دلێر تاهیر ئاماژەی بەوەشدا، ئەمڕۆ (سێشەممە، 19ـی ئایاری 2026) مسقاڵێک زێڕی عەیارە 21 بە 1 ملیۆن و 31 هەزار دینار مامەڵەی پێوەدەکرێت، هاوکات مسقاڵێک زێڕێ عەیارە 18 بە 826 هەزار دینار کڕین و فرۆشتنی پێوەدەکرێت.
