نوێنەری گشتیی مامۆستایانی گرێبەست ڕایدەگەیەنێت، لەسەر هەمیشەییبوونی مامۆستایانی گرێبەست، کارتی بانکی بۆ 15 هەزار مامۆستای گرێبەست هاتووتەوە.
عەلی ڕەئوف، نوێنەری گشتیی مامۆستایانی گرێبەست بە تۆڕی میدیایی ئێستای ڕاگەیاند، لە 37 هەزار و 933 مامۆستای گرێبەست، زیاتر لە 15 هەزاریان لە ڕێگەی مۆبایلەوە، کارتی بانکییان بۆ هاتووەتەوە و بۆ مانگی حوزەیران، لە ڕێگەی کارتی بانکییەوە مووچەکانیان وەردەگرن، ئەمەش دەرفەتێکە بۆ دامەزراندن و بەهەمیشەییبوونی مامۆستایانی گرێبەست.
وتیشی، لە پارێزگای دهۆک 7 هەزار مامۆستای گرێبەست کارتی بانکییان لە ڕێگەی نامەوە بۆ هاتووەتەوە، لە پارێزگای هەولێر 5 هەزار و لە پارێزگای سلێمانییش 3 هەزار مامۆستا.
ئاماژەی بەوەشکرد، سەبارەت بە بەهەمیشەییبوونی مامۆستایانی گرێبەست، بە نووسراوی ڕەسمی داوا لە سەرۆکی ئەنجومەنی نوێنەرانی عێراق کراوە، ئەویش ڕەزامەندیی داوە.
