قوباد تاڵەبانی، جێگری سەرۆکوەزیرانی هەرێمی کوردستان ڕایدەگەیەنێت، ئاسایش هێزێک نییە بۆ ترساندن، بەڵکوو هێزی رەواندنەوەی ترسی هاوڵاتییانە.
قوباد تاڵەبانی ڕایگەیاند، لە ڕێوەڕەسمێکدا بە ئامادەبوونی حەمەی حەمەسەعید، وەزیری ڕۆشنبیری و لاوان و هیوا ئەحمەد، سەرۆکی دەزگای ئاسایشی هەرێمی کوردستان، هەر یەکە لە عەمید خالید محەمەد قادر، وەک بەڕێوەبەری بەڕێوەبەرایەتیی گشتیی دیوان و عەقید هەوار مەجید قادر، وەک بەڕێوەبەری بەڕێوەبەرایەتیی ئاسایشی پارێزگای سلێمانی، دەستبەکاربوون.
ڕاشیگەیاند، لە ڕێوڕەسمەکەدا، پیرۆزباییمان لە هەردوو بەڕێوەبەری نوێ کرد و جەختمان کردەوە لە پێویستیی بردنەسەری ئاستی ڕۆشنبیری هێزەکانی ئاسایش. لەمەودوا دەزگای ئاسایش، بە هەماهەنگی لەگەڵ وەزارەتی ڕۆشنبیری و لایەنە پەیوندیدارەکانی دیکە، بە پلان و بەرنامەی نوێوە کاردەکات بۆ باشترکردنی مامەڵەی هێزەکان لەگەڵ چین و توێژە جیاوازەکانی کۆمەڵگە، چونکە ئاسایشی وڵاتەکەمان ئەو کاتە بەهێزتر دەبێت کە هەموو خەڵک خۆیان بە هاوکار و پشتیوانی هێزە ئەمنییەکان بزانن.
