شارەزایەکی بواری کەشناسی ڕایدەگەیەنێت، پلەکانی گەرما دادەبەزێت و ئەگەری هەورەبروسکە و تاوەباران هەیە.
ئاراس جەبار، شارەزای بواری کەشناسی ڕایگەیاند، سبەی دووشەممە، لە ئەنجامی کاریگەریی بارستەهەوایەکی سارد لە دەریای ناوەڕاستەوە بۆ سەر ناوچەکانمان، ئاسمانی هەرێمی کوردستان بەزۆری نیمچەهەور بۆ هەوری تەواو دەبێت و لە کاتەکانی بەرەبەیانەوە بۆ نیوەڕۆ، ئەگەری دروستبوونی ناجێگیرییەک لە بەرگەهەوادا دەبێت.
ڕاشیگەیاند، تاوەباران و چالاکبوونی هەورەبروسکە لە زۆرێکی ناوچەکانی سنووری پارێزگاکانی دهۆک و هەولێر و ئیدارەی سۆران و ڕاپەرین و هەندێک لە ناوچەکانی سنووری پارێزگاکانی سلێمانی، کەرکوک و هەڵەبجە دەبێت، پلەی گەرما بەراورد بە ئەمڕۆ، بە ڕێژەی 4 تا 5 پلە بەراورد بە ئەمڕۆ نزمدەبێتەوە و ڕێژەی بارانەکە بە جیاوازیی شوێنەکان لەنێوان 1 ملیم تا زۆرترین ڕێژە 15 ملیم دەبێت، بەتایبەت لە ناوچە شاخاوییەکان.
ئاماژەی بەوەشکرد، لە ئەنجامی کاریگەریی ئەو بارستەهەوایە لە سبەینێوە تا کۆتایی هەفتە، پلەی گەرما لە ناوچەکانمان بە جێگیری دەمێنێتەوە و بەرزبوونەوە بەخۆیەوە نابینێت و کەش لە ڕۆژدا فێنک و لە شەواندا کەمێک سارد دەبێت.
