سەركونسوڵی ئێران لە سلێمانی ڕایگەیاند، ڤیزا بە چوار گروپ لە هاوڵاتییانی هەرێم دەدرێت كە بە نیازبن سەردانی ئێران بكەن، خوازیاریشە هەرێمی كوردستان ڕێگاكانی گەشت ئاسایی بكاتەوە.
لە كۆنگرەیەكی ڕۆژنامەوانیدا لە سلێمانی ئەمڕۆ پێنجشەممە 1ی تشرینی یەكەم مەهدی شوشتەری، سەركونسوڵی ئێران لە سلێمانی ڕایگەیاند، “ئێستا چوار گروپ هاوڵاتی لە هەرێمەوە دەتوانن سەردانی ئێران بكەن، ئێمەش ئاسانكاریی تەواومان بۆ كردوون”.
سەبارەت بەو گروپانە مەهدی شوشتەری وتی، “ئەو قوتابییانەی لە ئێران دەخوێنن، ئەوانەی نەخۆشن و دەچنە ئێران بۆ چارەسەر، ئەو كەسانەشی كە تێكەڵاوی خێزانییان لەگەڵ هاوڵاتییانی ئێراندا هەیە و بازرگانان ئەو گروپانەن كە ئێستا ئاسانكارییان بۆ دەكرێت لە پێدانی ڤیزا”.
سەركونسوڵەكەی ئێران هیواشی خواست، لە داهاتوویەكی نزیكدا حكومەتی هەرێمیش بتوانێت بڕیار بدات لەبارەی گەشتیی نێوان هەرێم و ئێران و دەستپێكردنەوەیان.
پاش سەرهەڵدانی كۆرۆنا لە ناوچەكە، هەرێمی كوردستان قەدەغەی هاتوچۆی لە دەروازە سنورییەكان ڕاگەیاند، تا ئێستاش بارودۆخەكەی ئاسایی نەكردووەتەوە.
