ئەندامێكی لیژنەی نەوت و وزە لە ئەنجومەنی پارێزگای سلێمانی هۆكاری زیاتر بەرزبوونەوەی نرخی بەنزین ئاشكرادەكات و دەشڵێت، “حكومەت بە دوو رێگا دەتوانێت نرخی بەنزین هەرزانبكات”.
كەریم عەلی ئەندامی لیژنەی نەوت و وزە لە ئەنجومەنی پارێزگای سلێمانی لە لێدوانێكدا بە تۆڕی میدیایی ئێستای راگەیاند، ئەو بەنزینەی لە هەرێمی كوردستان هەیە بازرگانییە و بازرگانان نرخەكەی گراندەكەن، بەڵام حكومەت دەتوانێت سووتەمەنیی خاو بۆ پاڵاوگەكان بە نرخی پاڵپشتیكراو دابینبكات بەوەش داهاتێك بۆ حكومەت دەگەڕێتەوە ئەو بەنزینەی بەرهەمدەهێندرێت خواستی ناوخۆ پڕدەكاتەوە و دەتوانێت هەر خۆشی نرخی جێگیربكات و چیتر نرخەكەی بەرزبوونەوە بەخۆوە نەبینێت.
راشیگەیاند، ئەگەر هەنگاوی یەكەم جێبەجێنەكرا، ئەوا حكومەت دەتوانێت نەوتی خاو بە نرخی بازاڕەكانی جیهان بداتە پاڵاوگەكان و بڕێك قازانج بۆ پاڵاگە و بەنزینخانەكان دیاریبكات و دواتر خۆی نرخی بەنزین لە بازاڕدا بڕیاری لەسەر بدات و بەوەش دەتوانێت كۆنترۆڵی نرخی بەنزین بكات بەو پێیەی لە ئێستادا چاودێریی نرخی بەنزین لە بازاڕدا ناكرێت و بازرگانان هەر كاتێك بیانەوێت نرخی بەنزین گراندەكەن.
