بەڕێوبەرایەتیی کەشناسی و بومەلەرزەزانیی هەرێمی کوردستان ڕایدەگەیەنێت، لە ئێوارەی ئەمڕۆوە شەپۆلێکی بارانبارین ناوچەکانی هەرێمی کوردستان دەگرێتەوە.
بەڕێوبەرایەتیی کەشناسی و بومەلەرزەزانیی هەرێمی کوردستان بڵاویکردەوە، ئەمڕۆ شەممە، ئاسمان هەوری تەواو دەبێت لە کاتژمێرەکانی بەیانی بارانبارین بە لاوازی لە ناوچەکانی ڕۆژئاوای هەرێمی کوردستان دەستپێدەکات، پاشان بۆ پاشنیوەڕۆ و ئێوارە بارانی مامناوەند لە زۆربەی شوێنەکان دەبارێت، کە هەندێک بارانبارین بە شێوەی لێزمە باران و هەورەبروسکە دەبێت، هەروەها پێشبینی تاوەبارانی بەهاری، گەواڵە باران و تەرزەباران لە زۆرێک لە ناوچەکان دەکرێت.
باسی لەوەشکرد، سبەی یەکشەممە، ناسەقامگیریی کەشوهەوا بەردەوامدەبێت، ئاسمان بە زۆری هەوری تەواو دەبێت، لێزمەباران و هەورەبروسکە لە زۆربەی ناوچەکان لە کاتی جیا جیا دەبارێت، بەتایبەت لە ناوچە شاخاویەکان و سنووری ئیدارەی ڕاپەرین، کۆیە، سۆران، لە سنووری پارێزگای هەولێر و ناحیەی بەردەڕەش، باشووری پارێزگای سلێمانی و هەندێک ناوچەی گەرمیان.
