هەڤاڵ سدیق گەڵۆزی، شارەزای بواری کەشناسی رایگەیاند، شەپۆلێکی بەفر و باران بە دوو قۆناغی جیاواز ناوچەکانی هەرێمی کوردستان دەگرێتەوە، قۆناغی یەکەم لە ئێوارەی ئەمڕۆ چوارشەممە دەستپێدەکات و بارانبارین سەرەتا لە ناوچەکانی ئیدارەی سەربەخۆی زاخۆ، پاشان پارێزگای هەولێر و ئیدارەی سۆران و راپەڕین و ناوچە شاخاوییەکانی هەولێر و موسڵ دەستپێدەکات.
ئاماژەی بەوەشدا، کاریگەریی شەپۆلەکە لە بەرەبەیانیی سبەی پێنجشەممە فراوانتردەبێت و دەگاتە ناوچەکانی سنووری پارێزگاکانی سلێمانی و کەرکوک و هەڵەبجە و ئیدارەی گەرمیان.
هەڤاڵ سدیق گەڵۆزی ئاماژەی بەوەشدا، قۆناغی دووەمی شەپۆلەکە لە سەرەتای هەفتەی داهاتوو رۆژان شەممە و یەکشەممە دەستپێدەکات، هەروەها پلەی گەرمی 3 بۆ 5 پلەی سیلیزی دادەبەزێت.
لەبارەی کاریگەریی شەپۆلەکە، ئەو کەشناسە کوردە ئاماژەی بەوەدا، بڕی بارانبارین بەپێی کات و شوێن دەگۆڕێت؛ لەناوچە شاخاوییەکانی دهۆک، هەولێر، سۆران و راپەڕین بارانەکەی لەنێوان نمەباران بۆ بارانی مامناوەند دەبێت زۆرترین بڕی باران لەو ناوچانە دەبارێت.
