وەزارەتى پەیوەندییەکانى عێراق، بڕیارى زیادکردنى نرخى کارتى مۆبایل و ئینتەرنێت بە رێژەى %20 دەخاتە بوارى جێبەجێکردنەوە.
وەزارەتى پەیوەندییەکانی عێراق، لە نووسراوێکدا کە واژووى عەلى رەئوف حەمود، بەڕێوەبەرى بەڕێوەبەرایەتیی ژێرخانى پەیوەندییەکان و زانیاریی لەسەرە و ئاراستەى کۆمپانیاکانى مۆبایل و ئینتەرنێت کراوە، داوادەکات پابەندبن بە جێبەجێکردنى بڕیارى ژمارە هەزار و 83ـى ئەنجومەنى وەزیران بۆ زیادکردنى رێژەى %20 بۆ کرێى کارتى ئینتەرنێت و مۆبایلى بەشداربووانى خزمەتگوزارییەکانى کێبڵ و واى فاى، دواتریش گەڕاندنەوەى زیادەکە بۆ کۆمپانیاى گشتیی پەیوەندی و زانیارییەکان.
هەرچەندە حکومەتى عێراق، لە ساڵى 2023 باجى سەر کارتى ئینتەرنێت و مۆبایلى لابرد، بەڵام ئەنجوومەنى وەزیرانى عێراق لە کۆبوونەوەى رۆژى 16ـى کانوونى یەکەمى 2025، بڕیاریدا بە دووبارە گەڕاندنەوەى باجى %20 بۆ سەر نرخى کارتى ئینتەرنێت و مۆبایل.
تاوەکو ئێستا، حکومەتی هەرێمی کوردستان بە رەسمی لەسەر ئەم بڕیارە هیچ زانیارییەکی نەخستووەتەڕوو؛ پێشتر دیلان رەشاد، وتەبێژی وەزارەتی گواستنەوە و گەیاندنی هەرێمی کوردستان رایگەیاندبوو، هێشتا ئەم بڕیارە بۆ هەرێمی كوردستان نەهاتووە، لە عێراقیش جێبەجێبكرێت، هەرێمی كوردستان ناگرێتەوە، چونكە كۆمپانیاكانی ئینتەرنێت لەلای ئێمە مۆڵەت و گرێبەستیان هەیە و پابەندی رێنوێنییەكانی وەزارەتی گواستنەوە و گەیاندنن.
