د. توانا نەجەف رایدەگەیەنێت، رێککەوتن لەگەڵ کۆمپانیایەک کراوە تا بە قیست ئۆتۆمبێل بدرێتە مامۆستایان، فەرمانبەران، هەروەها مامۆستایانی گرێبەستیش دەتوانن سوودمەندببن.
د. توانا نەجەف، بەڕێوەبەری گشتیی کارگێڕی و دارایی لە وەزارەتی خوێندنی باڵا و توێژینەوەی زانستیی هەرێمی کوردستان، بە تۆڕی میدیایی ئێستای راگەیاند، “رێککەوتنمان لەگەڵ کۆمپانیایەکی ئۆتۆمبێل کردووە تاوەکو بە قیست ئۆتۆمبێل بداتە مامۆستایان و فەرمانبەرانی وەزارەتەکەمان، بەبێ ئەوەی هیچ زیادەیەک بچێتە سەر نرخەکەی، قیستەکەش لە کاتی هاتنی مووچەدا دەدرێت”.
وتیشی، “ئۆفەرەکە مامۆستایانی گرێبەستی زانکۆ و پەیمانگەکانیش دەگرێتەوە، ئەوانیش دەتوانن سودمەندببن”.
ئەوەشی خستەڕوو، “مەرجەکانی وەرگرتنی ئۆتۆمبێلەکە بریتییە لە بوونی فەرمانبەرێک وەک کەفیل، نرخی ئۆتۆمبێلەکان لەنێوان 24 ملیۆن دینار بۆ 55 ملیۆن دیناردایە، سەرەتا %20 بۆ %30 نرخی ئۆتۆمبێلەکە دەدرێت، بڕی پارەی ماوەش بە قیستی 36 مانگ، واتە سێ ساڵ دەدرێت و لە هەوڵداین ماوەی دانەوەی قیستەکە زیاتر بکەین”.
