ئەمشەو دوو تەقینەوە لە بەغداد ئەنجامدران و بە گوێرەی زانیارییە سەرەتاییەكان، قوربانییان لێنەكەوتووەتەوە.
تەقینەوەی یەكەم سەنتەرێكی مەساجكردنی لە ناوچەی كەڕادە كردووەتە ئامانج و زیانی مادی بەر شوێنەكە گەیاندووە.
بە گوێرەی سەرچاوە ئەمنییەكان، هەر ئەمڕۆ دووشەممە 1ی شوبات، تەقینەوەیەكی تر لەڕێگەی بۆمبەوە ئەنجامدراوە و مەیفرۆشییەكی پێكاوە.
سەرچاوە ئەمنییەكان ئاشكرایانكردووە، “تەقینەوەكە لە ناوچەی بەسمایە ئەنجامدراوە و زیانی گیانی بەدواوە نەبووە، بەڵام فرۆشگەكە زیانی زۆری پێگەیشتووە.”
تەقاندنەوەی مەیفرۆشییەكان لە بەغداد بووەتە دیاردە، دوو هەفتە لەمەوبەر لە یەك ڕۆژدا سێ فرۆشگەی خواردنەوە كحولییەكان تەقێندراوەتەوە و بەهۆیانەوە كەسێك برینداربوو، سەرباری ئەوەش زیانی زۆر بەر فرۆشگەكان كەوتن.
كۆتایی ساڵی ڕابردووش لە یەك ڕۆژدا پێنج بۆمب بۆ چەند فرۆشگەیەكی خواردنەوە كحولییەكان لە بەغداد دانران و چواریان تەقینەوە، ئەوەش زیانی مادیی زۆری بە فرۆشگەكان گەیاند.
