حزبوڵای لوبنان دەڵێت، فڕۆكەیەكی بێفڕۆكەوانی ئیسرائیلی خستووەتەخوارەوە.
ئەمڕۆ دووشەممە 1ی شوبات، حزبوڵای لوبنان ڕایگەیاند، “فڕۆكەیەكی بێفڕۆكەوانی سوپای ئیسرائیل هاتە ئاسمانی لوبنانەوە و خستمانەخوارەوە.”
لە ڕاگەیەندراوێكدا حزبوڵا ئاشكرایكرد كە ئێستا فڕۆكەكە لەلایەن چەكدارەكانییەوە دەستی بەسەردا گیراوە.
لە بەرانبەردا سوپای ئیسرائیل هەواڵەكەی پشتڕاستكردەوە و ڕایگەیاند، “فڕۆكەیەكی ئیسرائیل لە لوبنان خراوەتەخوارەوە.”
ڕوونیشیكردەوە كە فڕۆكەكە ئۆپەراسیۆنێكی لەنزیك هێڵی شین (هێڵی جیاكردنەوەی سنوور) ئەنجامداوە و لەوێ خراوەتەخوارەوە، بەڵام “داتا و زانیارییەكانی هاكنەكراون.”
لە كۆتایی مانگی تشرینی یەكەمی ڕابردوودا، ئیسرائیل دامەزراوەیەكی سەربازی و هەواڵگری لە سنووری لوبنان دروستكرد.
ئەوكات لە ڕێوڕەسمی كردنەوەی دامەزراوەكەدا كە فەرماندە سەربازییە باڵاكانی ئیسرائیل ئامادەیبوون، جەنەراڵ- ئەمیر بەرعەم، فەرماندەی فەرماندەیی باكوور لە سوپای ئیسرائیل وتی، “دامەزراوەكە بە پلانێكی ورد دروستكراوە و هاوشێوەی گوندێكی لوبنانییە، پشت بە قووڵایی هەواڵگری و تێگەیشتنی مەیدانی لە خاكی دوژمن دەبەستێت.”
لەو بارەیەوە سوپای لوبنان ڕایگەیاند، “مەبەست لە كردنەوەی دامەزراوە سەربازییەكە، ڕوبەڕوبوونەوەی حزبوڵای لوبنان و سەركەوتنە بەسەریدا.”
