هەڤاڵ سدیق گەڵۆزی، شارەزای بواری کەشناسی رایگەیاند، لە رۆژانی سێشەممە و چوارشەممە، شەپۆلێکی توندی بەفر و باران ناوچەکانی هەرێمی کوردستان دەگرێتەوە، لە زۆربەی ناوچەکان باران بە بڕی ”زۆر باش” دەبارێت و لە لەهەندێک ناوچە 50 بۆ 70 ملیم باران دەبارێت.
بەگوێرەی پێشبینییەکانی ئەو کەشناسە کوردە، زۆربەی ناوچەکانی هەرێمی کوردستان دەکەونە ژێر کاریگەریی شەپۆلەکە، زۆرترین بڕی بارانبارین لە ناوچەکانی پارێزگای سلێمانی و هەڵەبجە، ئیدارەی سۆران و ناوچە شاخاوییەکانی هەولێر دەبارێت. هەروەها لە ناوچە شاخاوییە سنوورییەکان ئەگەری بەفربارین هەیە و پلەی گەرما 3 بۆ 4 پلە دادەبەزێت.
هەڤاڵ سدیق گەڵۆزی پێشبینی دەکات کاریگەریی شەپۆلەکە بە چەند قۆناغێکی دیکە تاوەکو ناوەڕاستی ئەم مانگە بەردەوامیی هەبێت.
