وەزارەتی دەرەوە و وەزارەتی گەنجینەی ئەمریکا سێ لقی گرووپی ئیـ.ـخوان موسلیمینی لە وڵاتانی لوبنان، ئەردەن و میسڕ، خستە پۆلێنی گرووپە تیرۆرستییە بیانییەکان و دەڵێت، ئەو گرووپانە مەترسیین بۆسەر بەرژەوەندییەکانی ئەمریکا.
بڕیارەکە لەلایەن مارک روبیۆ، وەزیری دەرەوە و سکۆت بێسێنت، وەزیری گەنجینەی ئەمریکا پاش راوێژکردن بە هەریەکە لە پام بۆندی، داوکاری گشتیی ئەمریکا و تۆلسی گابارد، سەرۆکی دەزگای هەواڵگریی نیشتیمانیی ئەمریکا ئامادەکراوە.
رەشنووسی بڕیارەکە کە لەلایەن دۆناڵد ترەمپ، سەرۆکی ئەمریکاوە واژۆی لەسەرکراوە و لەلایەن کۆشكی سپییەوە بڵاوکرایەوە، تێیدا هاتووە، “گرووپەکە کە لقی لە وڵاتانی لوبنان، ئوردن و میسڕ هەیە، پاڵپشتی و هاوکاریی هەوڵەکان دەکەن بۆ تێکدانی ئارامی و هاندان بۆ توندوتیژی لە ناوچەکەیان و دژی هاوڵاتی و بەرژەوەندییەکانی ئەمریکا.”
هاوکات ئەوەش هاتووە، هەر کەسێك لە سنووری دەسەڵاتی ئەمریکا دابێت و هەوڵی کۆکردنەوەی هاوکاری و پاڵپشتی بۆ گرووپەکە بدات، لە ئەمریکا دەردەکرێت.
