سەرۆکى ژوورى بازرگانیی سلێمانى ئاشکرایدەکات، سیستمی نوێی باج هەرێمی کوردستانیش دەگرێتەوە، بۆیە هەموو شتێک گران دەبێت.
نەوزاد غەفوور، سەرۆکى ژوورى بازرگانیی سلێمانى لە کۆنفرانسێکی رۆژنامەوانیدا ئاشکرایکرد، ئەو سیستمە نوێیەی بۆ زیادکردنی گومرگ و باج لە عێراق دانراوە، هەرێمی کوردستانیش دەگرێتەوە.
وتیشی، لە ئێستادا کاریگەرییەکەی دەرناکەوێت، چونکە ئەو کاڵا و کەلوپەلانەی لە بازاڕدان بە باج و رسوماتی پێشتر هاتوون، بەڵام لە داهاتوودا نرخی کاڵاکان گران دەبێت.
ئەوەشی خستەڕوو، حکومەتی عێراق بانگەشەی ئەوە دەکات زیادکردنی باج و گومرگ بۆ پاراستنی بەرهەمی ناوخۆیە، بەڵام ئەمە پێویستی بە پێداچوونەوەیە، چونکە رەنگە ئێمە نەگەیشتبینە ئەو ئاستە لە خۆبژێوی.
