شارەزایەکی بواری کەشناسی رایدەگەیەنێت، ئەمشەو بارانی بەخوڕ لە زۆربەی ناوچەکانی هەرێمی کوردستان دەبارێت.
ئاراس جەبار، شارەزای بواری کەشناسی ئاشکرایکرد، کاریگەری نزمەپاڵەپەستۆی دەریای ناوەڕاست لەسەر ناوچەکانمان دەستیپێکردوە و ئاسمانی زۆربەی ناوچەکانی هەرێمی کوردستان و عێراق گۆراوە بۆ هەوری مامناوەند، هاوکات بەفربارین لە ناوچە شاخاویەکانی پارێزگای دهۆک دەستیپێکردوە، لە کاتەکانی ئێوارە و شەودا بارانبارین لە سەرجەم ناوچەکانمان و بەفری چر لەناوچە شاخاویە بەرزەکان دەستپێدەکات.
وتیشی، لەگەڵ چالاکتربوونی بای باشوری رۆژهەڵات، بەخێرای 15 تا 40 کم/ک و هەندێک کاتیش بەتایبەت لە ناوچەکانی سنووری قەزای ئاکرێ، ئیدارەی سۆران، راپەڕین و پارێزگای سلێمانی هەورەبرووسکە چالاک دەبێت و بارانی بەخوڕ دەبارێت، بۆیە ئەگەری بەرزبوونەوەی ئاستی ئاو بەتایبەت لە دۆڵ و چەمەکاندا دەبێت.
ئەوەشی خستەڕوو، بۆ سبەی شەممە، کاریگەری ئەو شەپۆلە لەسەر ناوچەکانمان بە رێژەی لاواز بۆ مامناوەند تا کاتەکانی ئێوارە بەردەوامی دەبێت و لە شەودا کۆتاییدێت، هەروەها بەهۆی گەیشتنی بارستەهەوایەکی سارد، سبەی پلەی گەرمی بەراورد بە ئەمڕۆ 4 تا 5 پلە نزمدەبێتەوە.
