حکومەتی هەرێمی کوردستان بڕیارێکی نوێ لە ساڵی تازەوە جێبەجێدەکات و هەموو هاوڵاتییان و کۆمپانیاکان، “دەبێت پێوەی پابەندبن”.
بەگوێرەی بڕیارەکە، لە ساڵی 2026ـەوە، دەبێت هەموو کۆمپانیا تۆمارکراوەکان لە هەرێمی کوردستان هەرکات پۆستە و بەریدیان هەبوو، لە رێگەی ‘کۆمپانیای ئیگڵ پۆست’ـەوە بیکەن، بەجۆرێک، هەموو کۆمپانیاکان سندوقێک لە کۆمپانیاکەی خۆیان دابنێن، تا کارمەندی ‘ئیگڵ پۆست’ بەریدەکە ببات بۆیان و 25 تا 300 هەزار دینار لە کۆمپانیاکان وەربگرن؛ ئەو پارەیەش، دەگەڕێتەوە بۆ کۆمپانیای ئیگڵ پۆست.
کۆمپانیای ئیگڵ پۆست، کۆمپانیایەکە کە حکومەتی هەرێمی کوردستان، ناوی ناوە ‘کۆمپانیای هاوبەشی حکومەت و کەرتی تایبەت’.
بەپێی زانیارییەکانی سەرچاوەیەکی ئاگادار، کاری کۆمپانیاکە لەگەڵ هاوڵاتییان، بەمشێوەیە دەبێت: لە ساڵی 2026ـەوە، ئەگەر هەر مامەڵەیەک بکەیت (دەرهێنان یان نوێکردنەوەی مۆڵەتی شۆفێری بە نموونە وەردەگرین) پسووڵەیەکت بۆ دەکرێت، ناونیشانت لێوەردەگیرێت و مامەڵەکەت بە بڕێک پارە کە لە 25 هەزار دینارەوە دەستپێدەکات تا 300 هەزار دینار، بۆ دەهێندرێتەوە.
ئەو سەرچاوەیە وتیشی، هیچ هاوڵاتییەک ناتوانێت خۆی مامەڵەکەی وەربگرێتەوە و بە ناچاری دەبێت بچێتەوە ماڵەوە و کۆمپانیای ئیگڵ پۆست، لە بەرامبەر بڕێک پارەدا بۆی دەگەڕێنێتەوە.
