ڕێبەر ئەحمەد، كاندیدی پارتی بۆ پۆستی سەرۆك كۆمار، لە وتارێكدا باس لە وابەستەبوون بە دەوڵەتی عێراق و پاراستنی بەرژەوەندییە باڵاكانی دەكات، دەڵێت، پێویستە سەرۆك كۆمار دەوڵەتی عێراق و دامەزراوەكانی بپارێزێت.
ڕێبەر ئەحمەد كاندیدی هاوپەیمانییە سیانییەكەی نێوان پارتی و سەدر و بەشێك لە سوننەكان، كە ناویانناوە “ڕزگاركردنی نیشتمان”، وتارێكی لە ژمارەی ئەمڕۆی ڕۆژنامەی “شەرقلئەوسەت” بڵاوكردووەتەوە، باس لە ئەركەكانی سەرۆك كۆمار دەكات بۆ دۆخی ئێستای عێراق و ناوچەكە و جیهان.
كاندیدەكەی پارتی نووسیویەتی، “ئێمە لە زەمەنی عێراقێكی نوێداین. دەنگی گەلەكەمان بیست كە سیستمێكی دەوێت لە ئاستی عێراق و مەزنیی مێژوویی گەلان و كەلتوورەكەیدا بێت، لە ساتی تاقیكردنەوەیەكی مەزنداین بۆ ئەو سەركردانەی خاكەكەیان خۆشدەوێت. مەرجی قۆناغەكە بریتییە لە وابەستەبوون “الولاء” بۆ دەوڵەت و پاراستنی بەرژەوەندییەكانی.
ڕێبەر ئەحمەد زیاتر لەوەش دەڵێت، “پێویستە سەرۆك كۆمار ئەو ڕۆڵە ڕاستەقینەیە ببینێت كە دەستوور بۆی دیارییكردووە، بۆ پاراستنی دەوڵەت و دامەزراوەكانی لە هەر هەڕەشەیەك”.
كاندیدی پارتی بۆ پۆستی سەرۆك كۆمار پێویستی و گرنگیی “هاوشانی” و “هەماهەنگی”ی نێوان بەغداد و هەولێر دووپاتدەكاتەوە، دەڵێت، هەردووكیان یەكتری تەواودەكەن.
