وەزارەتی ئەوقاف و کاروباری ئاینیی هەرێمی کوردستان راگەیەندراوێکی “دژی” شێواندنی گۆڕستانی کریستییانەکان لە شاری کۆیە، بڵاوکردەوە.
لە راگەیەندراوەکەی وەزارەتی ئەوقافدا هاتووە، شەوی رابردوو لەلایەن کەسانی گێرەشێوێن لە شاری کۆیە و گۆڕستانی کریستییانەکان، ژمارەیەک کێل و قەبری کریستییانەکان شکێندراون.
ئاماژە بەوەشدراوە، ئێمە لە وەزارەتی ئەوقاف و کاروباری ئاینی، ئیدانەی ئەم کارە تێکدەرانە دەکەین، کە دژی مێژووی ھاوبەش و پێکەوەژیانی ئاینییە، داوا لە دەزگا و لایەنە پەیوەندیدارەکانی قەزای کۆیە دەکەین، بەدواداچوون بکرێت و بکەرانی ئەم کارە ترسنۆکانەیە، دەستنیشانبکەن و دواتر رووبەڕووی دادگا بکرێنەوە.
وەزارەتی ئەوقاف دەشڵێت، “کەسوکاری کۆچکردووان دڵنیادەکەینەوە، کە وەزارەتمان ھەموو گۆڕەکان وەک خۆی نۆژەندەکاتەوە”.
