چوارچێوەی هەماهەنگی کۆبوونەوەی ژمارە 251ی ئەنجامدا و چەند بڕیارێکیان دەرکرد.
نووسینگەی راگەیاندنی چوارچێوەی هەماهەنگیی شیعەکان بڵاویکردەوە، لە کۆبوونەوەی ژمارە 251ی چوارچێوەکە، گفتوگۆکرا سەبارەت بە پێوەر و بنەما سەرەکییەکانی پۆستی سەرۆکوەزیران و رێکارەکانی هەڵبژاردنی ئەو کەسە، هەروەها دەبێت پڕۆسەی هەڵبژاردنی ئەو کەسە بەشێوەیەک بێت کە دڵنیایی بدرێت لە پێوەرە نیشتمانییە روون و ئاشکراکان لەو کەسەدا، پێویستە کەسەکە لێهاتوویی و توانای ئیدارەدانی دەوڵەتی تێدابێت.
ئەوەشی خستەڕوو، ئەندامانی کۆبوونەوەکە، گوێبیستی راپۆرتی دوو لیژنە راسپێردراوەکە بوون، کە چوارچێوەی هەماهەنگی لە کۆبوونەوەی پێشتردا پێکیهێنابوون، هەروەها رێککەوتن کرا و بڕیاردرا لەبارەی بەردەوامبوون لەسەر کاری هەردوو لیژنەکە و تەواوکردنی ئەرکەکانیان لەبارەی بابەتی هەڵسەنگاندنی کاندیدەکان و لەبەرچاوگرتنی ئەو خواستانەی خەڵک لەو کەسەدا دەیانەوێت، کە دەبێتە سەرۆکوەزیرانی داهاتووی عێراق.
