وتەبێژی کۆمسیۆنی باڵای سەربەخۆی هەڵبژاردنەکانی عێراق رایگەیاند، لیژنەی یاسایی بە سەرۆکایەتیی دادوەر و راوێژکاران بۆ یەکلاییکردنەوەی تانەکان پێکدەهێنرێت.
جومانە غەلای، وتەبێژی کۆمسیۆنی باڵای سەربەخۆی هەڵبژاردنەکانی عێراق رایگەیاند، “کۆمسیۆن لیژنەی لە فەرمانبەرانی یاسایی پسپۆڕ بە سەرۆکایەتیی ئەندامانی ئەنجومەنی کۆمسیاران کە لە دادوەر و راوێژکاران پێکهاتوون، بۆ یەکلاییکردنەوەی سکاڵاکان پێکهێناوە”.
وتیشی، هەر بڕیارێکی ئەنجومەنی کۆمسیاران لە ماوەی سێ رۆژ لە رۆژی بڵاوکردنەوەیەوە، لەبەردەم دەستەی دادوەریدا شایەنی تانەلێدانە.
ئاماژەی بەوەشکرد، دوای کۆتاییهاتنی قۆناغی تانەکان و یەکلاییکردنەوەیان، ئەنجامە کۆتاییەکان بە بڕیارێکی ئەنجومەنی کۆمسیاران رادەگەیەندرێن و دواتر لەلایەن دادگای فیدراڵییەوە پەسەنددەکرێن.
