دوو کۆڵبەری ڕۆژهەڵاتی کوردستان بە تەقەی ڕاستەوخۆی هێزە ئەمنییەکانی ئێران کوژرا و کۆڵبەرێکی دیکەش برینداربوو.
ڕێکخراوی هەنگاو بۆ مافەکانی مرۆڤ ئەمڕۆ پێنجشەممە 4ی سوبات بڵاویکردەوە، “بەهۆی تەقەی هێزە ئەمنییەکانی ئێران لە ژمارەیەک کۆڵبەری کورد لە بەرزاییەکانی سەردەشت دوێنێ چوارشەممە، کۆڵبەرێک کوژرا و یەکێکیش بریندار بوو”.
بەپێی ڕاگەیەنراوی ڕێکخراوەکە، ئەو کۆڵبەرەی گیانیلەدەستداوە ناوی (خالید ئەحمەد پور)ە و خەڵکی گوندی (وردە)ی سەربە سەردەشتە و خێزاندارە و خاوەنی دوو منداڵە.
ئاماژە بەوەشکراوە، کە هەر بەهۆی تەقەی هێزە ئەمنییەکانی ئێران کۆڵبەرێکی دیکە بەناوی هادی ڕەزایی بەسەختی برینداربووە.
لەڕاگەیەنراوەکەدا هاتووە، هەر دوێنێ کۆڵبەرێکی تەمەن 33 ساڵی خەڵکی بانه بە ناوی ”هاشم حەسەنی“ لە کاتی کۆڵبەری لە سنووری ”هەنگەژاڵ“ بە تەقەی ڕاستەوخۆی هێزە چەکدارەکانی ئێران کوژرا.
