بەڕێوەبەرایەتیی هاتوچۆی گەرمیان رایگەیاند، لەسەر رێگەی کەلار – دەربەندیخان، ئۆتۆمبێلێک وەرگەڕا و بەهۆیەوە سێ کەس برینداربوون.
بەڕێوەبەرایەتیی هاتوچۆی گەرمیان لە راگەیەندراوێکدا بڵاویکردەوە، پاشنیوەڕۆی ئەمڕۆ چوارشەممە، ئۆتۆمبێلێکی جۆری تۆیۆتا کراون، کە بە ئاراستەی قەزای دەربەندیخان رۆیشتووە، لەسەر پردی گوندی ئاوەخێری کۆنترۆڵی لەدەستدا و وەرگەڕا، بەهۆی رووداوەکەوە سێ کەس برینداربوون و دوو لە بریندارەکان ئافرەتن.
ئاماژەی بەوەشکرد، دوای وەرگرتنی چارەسەری پێویست لە نەخۆشخانەی شەهید مەلا ئەحمەد کەلاری لە باوەنوور، دوو لە بریندارەکان بەهۆی سەختیی برینەکانیانەوە رەوانەی فریاکەوتنی شەهید هەژار کران لە قەزای کەلار.
