قوباد تاڵەبانی رایگەیاند، دەرگای ماڵە گەورەکەی یەکێتی هەمیشە کراوەیە بە رووی یەکێتییە زویربووەکان، هەم ئەوان بەشێکن لە یەکێتی و هەم یەکێتی بەشێکە لە مێژوو و شوناسی ئەوان. دەشڵێت، “سەرکەوتنێکی زۆر گەورە بەدەستدەهێنین”.
قوباد تاڵەبانی، لێپرسراوی مەکتەبی سکرتاریەتی سەرۆک مام جەلال رایگەیاند، لە کۆبوونەوەم لەگەڵ هەڤاڵانی پێشمەرگە، خانەنشینانی پێشمەرگە، پێشمەرگە و تێکۆشەرە دێرینەکانی سنووری راپەڕین، داوام لێکردن بە هەمان روحی یەکێتییانە و پێشمەرگانەوە، لەم ماوەیەدا یەکێتییە زویربووەکان ئاشتبکەنەوە و هانی خەڵک بدەن بۆ دەنگدان بە یەکێتی، چونکە ئەم یەکێتییەی ئێستا، هەمان ئەو یەکێتییەیە هەمیشە داوایانکردووە و ئەو یەکێتییەیە کە خەڵک ئومێدی پێیەتی و دەتوانێت کێشەکان چارەسەربکات.
ئاماژەی بەوەشکرد، یەکێتی هەم خاوەنی مێژوویەکی جوان و درەوشاوەیە، هەم توانای قەناعەتپێهێنانی هەیە، بۆیە تەنیا مونافیسی یەکێتی، هەر خۆیەتی و هەڵبژاردن لە دوای هەڵبژاردن چاوی لە سەرکەوتنی گەورەترە. ئەمجارەش بە دڵنیاییەوە بەو پێشمەرگە و تێکۆشەر و جەماوەرە دڵسۆزەوە، سەرکەوتنی زۆر گەورە بەدەستدەهێنین.
