شارەزایەکی کەشناسی ئاشکرایدەکات، لە ئەنجامی کاریگەریی نزمەپاڵەپەستۆیەک، بەرەبەیانی رۆژی سێشەممە شەپۆلێکی بارانبارین ناوچەکانی هەرێم دەگرێتەوە.
ئاراس جەبار، شارەزای کەشناسی رایگەیاند، لە ئەنجامی کاریگەریی نزمەپاڵەپەستۆیەک کە سەرچاوەیەکەی باشووری ئەوروپا و دەریای ناوەڕاستەوە، لە بەرەبەیانی رۆژی سێشەمە 21ی تشرینی یەکەمی 2025، شەپۆلێکی بارانبارین بەرێژەی جیاجیا ناوچەکانی هەرێمی کوردستان دەگرێتەوە و تاوەکو ئێوارەی رۆژی چوارشەمە 22ی تشرینی یەکەمی 2025، بەردەوامدەبێت.
دەشڵێت، پێشبینیی بارانی کەم و پچرپچر دەکرێت بۆسەر ناوچەکانی پارێزگای سلێمانی، هەڵەبجە، کەرکوک، ئیدارەی راپەرین، پارێزگای هەولێر و ئیدارەی سۆران، هەروەها لە هەندێک شوێن بڕی بارانەکە زیاتر دەبێت و لە نێوان 2 تا 5 ملیمەتر دەبێت.
ئاماژەی بەوەشکرد، لە سنووری پارێزگای دهۆک، بەتایبەت ئیدارەی زاخۆ و ناوچە شاخاویەکانی پارێزگاکە کاریگەرییەکانی شەپۆلەکە بەهێزدەبێت، لەو ناوچانەدا ئەگەری بارانی بەخوڕ، تەرزە و چالاکبوونی هەورە بروسکەی بەهێز لەئارادا دەبێت.
ئەوەشی خستەڕوو، لە هەندێک شوێن ئەگەری ئەوە دەبێت کە لافاو دروستبێت و بارانێکی زۆر ببارێت، بڕی بارانەکەش لەنێوان 20 تا 50 ملیمەتربێت، هەروەها پلەی گەرمیش لەماوەی ئەم شەپۆلەدا بە جیاوازیی ناوچەکان 5 تاوەکو 8 پلە نزمدەبێتەوە، پاشان لە کۆتایی هەفتەوە بەرزبوونەوە بەخۆیەوە دەبینێتەوە.
