پاش 30 مانگ لە راگیرانی و بە رێککەوتنی سێ قۆڵی لەنێوان حکومەتی هەرێمی کوردستان، حکومەتی عێراق و کۆمپانیا نەوتییەکان، نەوتی هەرێمی کوردستان گەیشتە بەندەری جەیهان.
بەگوێرەی زانیارییەکان، ئەمڕۆ بە ئامادەبوونی نوێنەری حکومەتی هەرێم و نوێنەری کۆمپانیای سۆمۆ، رێورەسمی هەناردەکردنەوەی نەوتی هەرێم بەڕێوەچوو و کاتژمێر 06:50ی سەرلەبەیانی قفڵەکان کرانەوە.
لای خۆیشیەوە عەلی نزار، بەڕێوەبەری کۆمپانیای سۆمۆ لە لێدوانێکدا رایگەیاند، “رێککەوتنەکە بەرەنجامی 30 مانگ دانوستان بووە و کاتی نییە، بەڵکو دەبێتە بناغەی رێککەوتنێکی دوورمەودا و کۆتایی بە چەندین ساڵ ناکۆکیی نێوان هەولێر و بەغداد دەهێنێت.”
وتیشی، نەوتی خاوی بەرهەمهێندراوی کێڵگەکانی هەرێمی کوردستان رادەستی کۆمپانیای بەبازاڕکردنی نەوت دەکرێت، 50 هەزار بەرمیل نەوت رۆژانە بۆ بەکارهێنانی ناوخۆیی هەرێمی کوردستان دەبێت و وەزارەتی سامانە سرووشتییەکانی هەرێمی کوردستان سەرپەرشتیی بەکارهێنانی دەکات.
