دەزگای ئاسایشی هەرێمی کوردستان روونکردنەوەیەکی سەبارەت بە رووداوی هەڵکوتانە سەر ماڵێک لە پارێزگای هەڵەبجە، بڵاوکردەوە.
لە روونکردنەوەکەدا هاتووە، دوای ئەوەی گرتە ڤیدیۆیەک لە چەند کەناڵ و پەیجێک بڵاوکرایەوە کە کەسێک هێرشدەکاتە سەر ماڵی هاوڵاتییەک، دەستبەجێ هێزەکانی بەڕێوەبەرایەتیی ئاسایشی شارەزوور بەدواداچوونی وردیان لەسەر رووداوەکە ئەنجامدا.
دەشڵێت، هێزەکانی ئاسایشی بە بڕیاری دادوەری لێکۆڵینەوەی ئاسایشی شارەزوور، تۆمەتباری رووداوەکەیان دەستگیرکرد و خاوەنی ماڵەکەش فەرمانی دەستگیرکردنی لە رابردوودا هەبووە، بەو هۆکارە رووبەڕووی دادگا کرانەوە.
ئاماژەی بەوەشکرد، لەئێستادا هەردوو تۆمەتباری رووداوەکە بە بڕیاری دادوەر راگیراون و لێکۆڵینەوە لە کەیسەکەیان بەردەوامە.
