ئاژانسی رۆیتەرز ئاشکرایکرد، سبەینێ بەمەبەستی دەستپێکردنەوەی هەناردەی نەوتی هەرێمی کوردستان، كۆبوونەوەیەکی سێ قۆڵیی لەنێوان هەرێم، بەغداد و كۆمپانیاكانی نەوت ئەنجامدەدرێت.
ئاژانسی رۆیتەرزی بەریتانی بڵاویکردەوە، بڕیارە سبەینێ لە باڵەخانەی وەزارەتی نەوتی عێراق لە بەغداد، بەمەبەستی واژووکردنی رێککەوتنی سێ قۆڵیی لەنێوان هەرێم، بەغداد و کۆمپانیا نەوتییەکان و دەستپێکردنەوەی هەناردەی نەوتی هەرێم، کۆبوونەوەیەک ئەنجامبدرێت و ئاستەنگییەکان چارەسەردەکرێن.
باسی لەوەشکردووە، بڕیارە لە کۆبوونەوەکەدا ئەو ئاستەنگی و تێبینییانەی لەبارەی دۆسیە و پرسی دەستپێکردنەوەی هەناردەی نەوتی هەرێم لەنێوان هەرسێ لا-دا کە ماوە، چارەسەربکرێن.
هەر بەپێی زانیارییەکانی رۆیتەرز، چاوەڕواندەكرێت لە 48 کاتژمێری داهاتوودا بڕیاری كۆتایی لەسەر ئەو دۆسیەیە بدرێت، پاشان رێككەوتنەكە لەنێوان وەزارەتی سامانە سروشتییەكانی هەرێم، وەزارەتی نەوتی عێراق و كۆمپانیا نەوتییەکان واژووبکرێت.
