ئەنجومەنی دەوڵەت کۆبوونەوەی ئەمڕۆی لەبارەی ناکۆکییەکانی هەرێم و بەغداد، بۆ رۆژی سێشەممەی ئەم هەفتەیە دواخست.
بەپێی زانیارییەکان، ئەنجومەنی دەوڵەت بڕیاریدا بۆ کۆبوونەوەکەی رۆژی سێشەممە بانگهێشتی دوو راوێژكاری یاسایی لە وەزارەتی داد و دارایی هەرێم بكات، تاوەکو لە كۆبوونەوەی داهاتوو بە ئامادەبوونی دوو راوێژکارەکەی هەرێم، گفتوگۆ لەبارەی راپۆرتەكەی ئەنجومەنی وەزیرانی عێراق بکرێت.
هەر بەپێی زانیارییەکان، ئەنجومەنی دەوڵەت هەوڵدەدات رۆژی سێشەممە پێش كۆبوونەوەی ئەنجومەنی وەزیران راپۆرت و روونکردنەوەی خۆی لەبارەی دۆسیەی داهاتی نانەوتیی هەرێم بخاتەروو.
لەوبارەیەوە، سەرچاوەیەکی ئاگادار لە کۆبوونەوەکەی ئەمڕۆی ئەنجومەنی دەوڵەت رایگەیاند، ئەگەر ئەنجومەنەکە پێش كۆبوونەوەکەی ئەنجومەنی وەزیرانی عێراق، نەیتوانی راپۆرتی خۆی پێشكەشبكات، ئەوا رۆژی چوارشەممە جارێكی دیکە كۆدەبێتەوە.
