مەسرور بارزانی، سەرۆکی حکومەتی هەرێمی کوردستان، ئەمڕۆ پێنجشەممە 28ی کانونی دووەم لە دیدارێکدا لەگەڵ ماتیۆ تولەر، باڵیۆزی ئەمریکا لە عێراق تاوتوێی پەیوەندییەکانی هەردوولا و دانوستانەکانی نێوان هەرێمی کوردستان و حکومەتی فیدراڵیان کرد.
لە راگەیەنراوێکی سەرۆکایەتیی ئەنجومەنی وەزیرانی هەرێمی کوردستاندا هاتووە، “مەسرور بارزانی، سەرۆکی حکومەتی هەرێمی کوردستان پێشوازیی کرد لە ماتیۆ تولەر، باڵیۆزی ئەمریکا لە بەغداد و بارودۆخی عێراق و پەرەپێدانی زیاتری پەیوەندییەکانی هەرێمی کوردستان و ئەمەریکا تاوتوێ کرا”.
هەر لە دیدارەکە سەرۆکی حکومەتی هەرێمی کوردستان خۆشحاڵی خۆی دەڕیوە لەوەی کە سەرۆکی نوێی ئەمریکا و ئیدارەکەی شارەزا و ئاگاداری بارودۆخی عێراق و هەرێمی و کوردستانن.
مەسرور بارزانی راشیگەیاندووە، ” ئامادەین بۆ کارکردن و هەماهەنگیکردن بۆ بەهێزترکردن و برەودان بە پەیوەندییەکانمان لە گەڵ ئەمەریکا لە هەموو بوارەکاندا”.
لە ڕاگەیەنراوەکەدا ئاماژە بەوەشکراوە کە بەشێکی دیکەی دیدارەکە تایبەت بووە بە ڕێڕەوی دانوستانەکانی هەرێمی کوردستان و حکومەتی فیدراڵی و هەڵبژاردنی داهاتووی عێراق و گرنگیی بەردەوامبوونی هەماهەنگیی بۆ ڕوبەڕوبوونەوەی هەڕەشەکانی تیرۆر و لێکەوتەکانی و کێشە ئابووری وسیاسییەکانیان.
