پارێزگاری هەڵەبجە رایدەگەیەنێت، ئەمڕۆ نوخشە ناسیح، وەک یەکەمی ژنە پارێزگار لەسەر ئاستی عێراق و هەرێم، خەڵاتی رێزلێنانی پێبەخشرا.
نوخشە ناسیح، پارێزگاری هەڵەبجە لە تۆڕی کۆمەڵایەتیی فەیسبوک بڵاویکردەوە، “ئەمڕۆ، لە دەیەمین کۆڕبەندی نیشتمانی بۆ رێزلێنان لە نوخبە نیشتمانییەکان، کە بە پاڵپشتیی پارێزگاری سلێمانی بەڕێوەچوو، وەک یەکەمین خاتوون لە پۆستی پارێزگار لەسەر ئاستی عێراق و کوردستان، خەڵاتی رێزلێنانمان پێبەخشرا”.
ئاماژەی بەوەشکرد، ئەم خەڵاتە کە لەلایەن نوێنەرانی چەندین پارێزگای عێراق و کوردستانەوە پێشکەشکرا، نەک تەنها بۆ ئێمە، بەڵکو دەستکەوتێکە بۆ هەموو ژنانی تێکۆشەری کوردستان.
ئەوەشی خستەڕوو، “وەرگرتنی ئەم خەڵاتە، داننانێکی گرنگە بە توانای ژنانی کورد لە وەرگرتنی پۆستە باڵاکان و سەرکەوتنیان لە ئەرکەکانیاندا؛ بەردەوامدەبین لە خزمەتکردن”.
