سەرۆک وەزیرانی عێراق لە پەیوەندییەکی تەلەفۆنیدا بە سەرۆکی فەڕەنسای راگەیاند، ئەگەر پەیوەندییەکانی ئەمریکا و ئێران لەم ئاستەدا بێت، ئەگەری سەرهەڵدانی جەنگێکی گەورە لەئارادایە.
نووسینگەی راگەیاندنی سەرۆک وەزیرانی عێراق بڵاویکردەوە، ئەمڕۆ محەمەد شیاع سودانی، پەیوەندییەکی تەلەفۆنی لە ئیمانوێل ماکرۆنەوە پێگەیشتووە و لە پەیوەندییەکەدا هەردوولا جەختیان لە هەماهەنگی و بەرەوپێشبردنی زیاتری پەیوەندییەکانیان کردووەتەوە.
هەروەها گفتوگۆی ئەوە کراوە، کە چۆن هەماهەنگی و پەیوەندییەکانی نێوان هەردوو وڵات لە بوارە جیاوازەکانی دیکەدا زیاتر پەرەیانپێبدرێت و، گفتوگۆی پرسە هەرێمی و نێودەوڵەتییەکانیش کراوە.
نووسینگەکە ئاماژەی بەوەشکرد، سودانی بە ماکرۆنی وتووە، حکومەتی عێراق هەوڵی ئەنجامدانی کۆنفرانسێک دەدات، تێیدا پرس و دۆسییە هەرێمییەکان بەرباس دەخرێن و بەدوای رێگەچارەدا دەگەڕێن.
سەرۆک وەزیرانی عێراق لە پەیوەندییە تەلەفۆنییەکەدا جەختی لەوە کردووەتەوە، عێراق ئامادەیە کار لەگەڵ فەڕەنسا و هاوپەیمانەکانی دیکەیدا بکات، کە لەنێوان ئێران و ئەمریکا هەماهەنگ و ناوبژیکەر بێت، تاوەکو رێگری لە هەر گرژییەکی دیکە بکرێت لە نێوان ئەو دوو وڵاتەدا.
سودانی وتووشیەتی: “عێراق لە رێگەی دیالۆگەوە، هەر هەنگاوێکی پێویست دەگرێتەبەر تاوەکو رێگری لە هەر جەنگ و گرژییەک بکات لە ناوچەکەدا”، هەروەها هۆشداریشداوە لە ئەگەری هەڵگیرسانی جەنگێکی نوێ لە ناوچەکەدا ئەگەر پەیوەندیی نێوان ئەمریکا و ئێران بەم شێوە “خراپە” بمێنێتەوە.
لای خۆیەوە ئیمانوێل ماکرۆن، هەوڵەکانی عێراقی بۆ بەرقەراکردنی ئارامی و ئاسایشی ناوچەکە بەرزنرخاندووە و جەختی لەوەکردووەتەوە، فەڕەنسا پەیوەندییەکی قووڵی لەگەڵ عێراق هەیە و، هەمیشە هەوڵی هێشتنەوەی ئەو پەیوەندییە دەدات.
