مەکتەبی سیاسیی پارتی دیموکراتی کوردستان بڵاویکردەوە، جەخت لە سەروەریی یاسا و پاراستنی ئارامی و سەقامگیریی شاری سلێمانی و هەرێمی کوردستان دەکەنەوە.
مەکتەبی سیاسیی پارتی دیموکراتی کوردستان لە راگەیەندراوێکدا بڵاویکردەوە، “هەرێمی کوردستان قەوارەیەکی دەستووریی و بەرهەمی تێکۆشان و قوربانیدانی چەندین ساڵەی رۆڵەکانی گەلی کوردستانە و خاوەنی دامەزراوەی شەرعی و یاساییە، جەخت لە سەروەریی یاسا و پاراستنی ئارامی و سەقامگیریی شاری ئازیزی سلێمانی بەتایبەتی و هەرێمەکەمان بەگشتی دەکەینەوە”.
لە بەشێکی دیکەی راگەیەندراوەکەدا باسیلەوەکرد، “پێویستە چارەسەرکردنی جیاوازی و کێشەکان بەڕێگەی دیالۆگ و لێکتێگەیشتن بێت، هەر کار و کاردانەوەیەک کاریگەریی خراپی لەسەر سەقامگیری و پێکەوەژیان و ناوبانگی هەرێمی کوردستان هەبێت، بەباش نازانین”.
لە بەشێکی دیکەی راگەیەندراوەکەدا هاتووە، “لە نیگەرانی و دڵەڕاوکێی خەڵک تێدەگەین و لەپێناو هەرێمەکەمان و ئارامیی دەروونی هاووڵاتییانی هێژا، داوامان لە هەموو لایەک ئەوەیە دانبەخۆیان دابگرن و پارێزگاری لە سەروەریی یاسا و دامەزراوەکان بکەن و، هەر جۆرە گرژی و هێرشێکی میدیایی خزمەت بە هەرێمی کوردستان ناکات و پێویستە رابگیرێت”.
