سەرۆکایەتیی کۆماری عێراق رایدەگەیەنێت، گیانلەدەستدانی ئەو دوو کەسە خۆبەخشەی هەڵەبجە لە ئاگرەکەدا، گوزارشت لە قوربانیدان بۆ پاراستنی ژینگە دەکات.
لە بەیاننامەیەکی سەرۆکایەتیی کۆماردا هاتووە، “بە دڵتەنگی و خەمێکی قووڵەوە هەواڵی گیانلەدەستدانی دوو خۆبەخشی ئازامان لە پارێزگای هەڵەبجە لە کاتی هەوڵدان بۆ کوژاندنەوەی ئاگرێک، پێگەیشت”.
ئاماژەی بەوەشکرد، “ئەم کردەوە قارەمانانەیە گوزارشت لە قوربانیدان و خۆبەخشی دەکات بۆ پاراستنی نیشتمان، ژینگە و سروشت”.
سەرۆکایەتیی کۆمار دەشڵێت، “پرسە، سەرەخۆشی و هاوخەمیی خۆمان ئاراستەی کەسوکاری ئەو دوو کۆچکردووە دەکەین. خودای گەورە رەحمیان پێبکات، ئارامیی هەتاهەتایی بەهەشتیان پێببەخشێت و سەبووری و دڵنەوایی بە کەسوکارەکانیان ببەخشێت. داواش لە هەموو لایەک دەکەین کە لەم کارە قارەمانانەیە بۆ پاراستنی نیشتمان و ژینگە، ئیلهام وەربگرن”.
