هاتوچۆی سلێمانی رایگەیاند، لەسەر هەڵگرتنی قەرەج کەسمان سزا نەداوە.
بەڕێوەبەرایەتیی هاتوچۆی سلێمانی، بڵاویکردەوە، سەرجەم هاوڵاتییان و دامو دەزگاکانی راگەیاندن ئاگاداردەکەینەوە کە وێنەی پسوڵەی سزایەک بڵاوکراوەتەوە لە بەشێکی زۆر لە پەیج و ئەکاونتەکان کە گوایە چەند شۆفێرێک بەهۆی سەرپێچییەک کە (سەرخستنی قەرەج)ە لە سوارڕەوەکانیاندا سزادراون.
دەشڵێت، بە هەموو لایەکی رادەگەیەنین کە ئەم بابەتە تەواو ناڕاستە و دوور و نزیک پەیوەندی بە بەڕێوەبەرایەتیمانەوە نییە، وە ئەو پسوڵەیە کە بڵاوکراوەتەوە دروستکراو و (فەیکە).
هاتوچۆی سلێمانی دەڵێت، لەناو سەرجەم یاساو رێنماییەکانی هاتوچۆ وە هەموو جۆرە سەرپێچییەکانی بواری هاتوچۆ لە هەرێمی کوردستاندا سەرپێچییەکمان نییە لەژێر ناونیشانی ( سەرخستنی قەرەج لە سوارڕەودا).
لە راگەیەندراوەکەدا هاتووە، پێویستە دامو دەزگاکانی راگەیاندن لە هەرێمی کوردستاندا پیشەییانە وە بەرپرسیارانە و بەڕەچاوکردنی ئیتیکی کاری رۆژنامەوانی بابەتەکانیان بڵاوبکەنەوە و ناکرێت ئەوان بکەونە ژێر کاریگەریی هەواڵە ساختە و چەواشەکارییەکان.
