بەڕێوەبەرایەتیی پۆلیسی سلێمانی رایدەگەیەنێت، لەلایەن مەفرەزەكانی بنكەی پۆلیسی سەیدسادقەوە، تۆمەتباری کوشتنی ئەو هاوڵاتییە دەستگیركرا كە چەند رۆژێك پێش ئێستا، لەو قەزایە كوژرا.
لە راگەیەندراوێکی بەڕێوەبەرایەتیی پۆلیسی سلێمانی کە وێنەیەکی دەست تۆڕی میدیایی ئێستا کەوتووە، هاتووە، دوای ئەوەی رۆژی 25ـی 7ـی 2025، لە سنووری قەزای سەیدسادق هاوڵاتییەك كوژرا، هێزەكانی پۆلیس دەستبەجێ گەیشتنە شوێنی رووداوەكە و كەشف و هێڵكاریی شانۆی تاوان ئەنجامدرا و توانرا دوو كەس بەتۆمەتی ئەنجامدانی تاوانەكە، دەستگیربكرێن.
دەشڵێت، لێكۆڵینەوەكانی پۆلیس بەردەوامبوو و بەڵگەی پێویست كۆكرایەوە تا گەیشتە ئەو ئەنجامەی كە یەكێك لە تۆمەتبارە دەستگیركراوەكان، هەستاوە بە ئەنجامدانی تاوانەكە و لەئێستادا، (ك، ب، ق لەدایكبووی 2001) بە بڕیاری دادوەر و بەپێی ماددەی 406 لە یاسای سزادانی عێراقی راگیراوە و دانی ناوە بە تاوانەكەیدا.
پۆلیسی سلێمانی باسلەوەشدەکات، ئەو تۆمەتبارەی دەستگیرکراوە، كوڕی تاوانلێكراوەكەیە.
