لە پەرلەمانی عێراقەوە هەوڵێك خراوەتەگەڕ بۆ گەڕاندنەوەی ئەو شایستە داراییانەی زیندانییانی سیاسی كە بڕدراون.
عەبدلئیلا نائیلی، سەرۆكی لیژنەی شەهیدان و زیندانییانی سیاسی لە پەرلەمانی عێراق ڕایگەیاند، “هەڵمەتێكی ئیمزاكۆكردنەوەیان دەستپێكردووە بۆ گەڕاندنەوەی ئەو شایستە داراییانەی حكومەت لە زیندانییانی سیاسی بڕیون.”
وتیشی، “بۆ ئەوەی حكومەت و فەرمانگەكانی لێكدانەوەی هەڵە بۆ یاسای خانەنشینی نەكەن و یاسای ماف و ئیمتیازانی زیندانییانی سیاسی جێبەجێ بكەن و شایستەی دارایی بڕاوی زیندانییانی سیاسی بگەڕێننەوە، 50 پەرلەمانتار ئیمزامان كۆكردووەتەوە.”
ئاشكراشیكرد كە حەسەن كەعبی جێگری سەرۆكی پەرلەمان یاداشتەكەی پەسەندكردووە و پەراوێزی لەسەر نووسیوە بۆ هەردوو لیژنەی یاسایی و شەهیدانی پەرلەمان بۆ ئەوەی بەزووترین كات یاسای خانەنشینی هەمواربكەنەوە و مافی زیندانییانی سیاسی بگەڕێندرێتەوە.
