میدیاکانی ئێران بڵاویانکردەوە، لە هێرشەکەی بەیانیی ئەمڕۆ بۆسەر دادگای زاهیدان، هەشت کەس کوژران و 22 کەسی دیکەش برینداربوون.
ئەو میدیایانە لە زاری سەرچاوەیەکی پزیشکییەوە بڵاویانکردەوە، زۆربەی قوربانییەکان هاوڵاتیی مەدەنی بوون و لەنێویاندا ژنێک و منداڵێک هەن کە لەوکاتەدا لە دادگاکەدا بوون.
هاوکات سوپای پاسداران دەڵێت، کاتژمێر 8:30 خولەکی بەیانی، سێ چەکدار هەوڵیانداوە هێرشبکەنە سەر دادگاکە و هێزە ئەمنییەکان رووبەڕوویان بوونەتەوە، لە ئەنجامدا دەستبەجێ یەکێک لە هێرشبەرەکان دوای شەڕ و پێکدادانەکە گیانیلەدەستداوە. یەکێکی دیکەشیان، نارنجۆکێکی دەستی لەناو دادگاکەدا تەقاندووەتەوە کە بەهۆیەوە چەند کەسێک بوونەتە قوربانی، لەنێویاندا منداڵێکی تەمەن یەک ساڵ و دایکی.
ئاماژەی بەوەشکرد، پاش کوژرانی ئەندامی یەکەمی هێرشبەرەکان، دواتر هێزە ئەمنییەکان دوو ئەندامەکەی دیکەیشیان کوشت و تەواوی گروپەکەیان لەناوبرد.
پاش رووداوەکە، جەیش ئەلعەدل (سوپای داد) بەرپرسیاریەتیی هێرشەکەی لەئەستۆگرت، کە گرووپێکە لەلایەن ئێران و ئەمریکاوە وەک رێکخراوێکی تیرۆریستی دەستنیشانکراوە؛ ئەو گرووپە بانگەشەی ئەوە دەکات کە خەبات بۆ مافەکانی کەمینەی بەلووچ لە ئێران دەکات.
