ئەندامێکی ئەنجومەنی نوێنەرانی عێراق رایدەگەیەنێت، بڕیارە چەند رۆژێکی دیکە، لیستی مووچەی مانگی حەوتی مووچەخۆران بۆ بەغداد بنێردرێت.
سروە محەمەد، ئەندامی ئەنجومەنی نوێنەرانی عێراق رایگەیاند، دوای کێشەیەکی زۆر لەنێوان هەرێم و بەغداد و، هاتن و چوونی کۆمەڵێک وەفد لەنێوان هەردوولا، هەروەها پاش سەردانی سەرۆک بافڵ جەلال تاڵەبانی بۆ بەغداد، گرێکوێرەی ئەم کێشانە کرایەوە و رێککەوتن کرا.
وتیشی، چاوەڕوان دەکەین سبەی و دوو سبەی، مووچەی مانگی پێنج بنێردرێت کە بڕەکەی زیاترە لە 950 ملیار دینار.
لەبارەی لیستی مووچەی مانگەکانی شەش و حەوتیشەوە وتی، “لەئێستادا لیستی مووچەی مانگی شەش لە وردبینیدایە و لە چەند رۆژی داهاتووشدا، حکومەتی هەرێم لیستی مووچەی مانگی حەوت دەنێرێت”.
