قوباد تاڵەبانی، جێگری سەرۆك وەزیران پێشوازیكرد لە ئانل بۆرا ئینان، باڵیۆزی توركیا لە عێراق و لە كۆبوونەوەی نێوانیاندا پرۆسەی ئاشتی لە توركیا، پەیوەندییەكانی هەرێم و بەغداد و چەند پرسێكی دیكە تاوتوێكران.
لە تەوەرێكی كۆبوونەوەكەدا كە رۆژی پێنجشەممە لە هەولێر بە ئامادەبوونی ئەرمان تۆبجو، كونسوڵی گشتیی توركیا لە هەرێم بەڕێوەچوو، باس لە دوایین بەرەوپێشچوونەكانی پرۆسەی ئاشتی لە توركیا كرا و جێگری سەرۆك وەزیران پرۆسەی چەكدانانی بە هەنگاوێكی مێژوویی ناوبرد و هیوای خواست هەنگاوەكانی دیكەی پرۆسەی ئاشتی بە سەركەوتوویی بەڕێوەبچێت و لەم چوارچێوەیەشدا جەختیكردەوە لەسەر پشتیوانیی حكومەتی هەرێم لە پرۆسەكە و ئامادەیی هەرێمی كوردستانیشی دەربڕی بۆ هەموو جۆرە هاوكارییەك بۆ سەرخستنی پرۆسەكە.
لە بەشێكی دیكەی كۆبوونەوەكەدا باس لە كێشەی فڕۆكەخانەی نێودەوڵەتی سلێمانی كرا و قوباد تاڵەبانی داوایكرد توركیا ئاسمانی وڵاتەكەی بەڕووی گەشتەكانی فڕۆكەخانەی نێودەوڵەتیی سلێمانیدا بكاتەوە.
لە تەوەرێكی دیكەدا گفتوگۆكرا لەبارەی پەیوەندییەكانی نێوان هەرێم و بەغداد و لەم چوارچێوەیەشدا جێگری سەرۆك وەزیران رێككەوتنی نێوان هەرێم و بەغدای لەبارەی چارەسەركردنی كێشەی مووچە و هەناردەكردنەوەی نەوتی هەرێمی بە هەنگاوێكی گرنگ بۆ بەهێزتركردنی پەیوەندییەكانی نێوان هەرێم و بەغدا زانی و رایگەیاند، هەرێمی كوردستان خوازیارە هەموو كێشەكانی لەگەڵ بەغداد بەپێی دەستوور چارەسەربكات و باڵیۆزی توركیاش خۆشحاڵی خۆی لە رێككەوتنەكە دەربڕی و هیوای خواست پەیوەندییەكانی نێوان هەرێم و بەغداد بەرەوپێشچوونی زیاتر بەخۆیەوە ببینێت.
