وەزارەتی سامانە سروشتییەکان رایدەگەیەنێت، ئامانج لە هێرشە درۆنییەکانی سەر کێڵگە نەوتییەکان لێدانە لە ژێرخانی ئابووری هەرێمی کوردستان و دروستکردنی مەترسییە لە سەر سەلامەتی کارمەندانی مەدەنی کەرتی وزە.
وەزارەتی سامانە سروشتییەکانی هەرێم لە راگەیەندراوێکدا بڵاویکردەوە، بەیانی ئەمڕۆ لە رێگای درۆنی بۆمبڕێژکراوەوە ژمارەیەک هێرشی تیرۆریستی کرایە سەر کێڵگەکانی نەوتی تاوکێ و پێشخابوور و عین سفنی لە ئیدارەی سەربەخوی زاخۆ و قەزای شێخان سەر بە پارێزگای دهۆک، هەرچەندە زیانی گیانیان نەبووە، بەڵام زیانێکی زۆری بە ژێرخانی کێڵگەکان کەوتووە.
ئاماژەی بەوەشکرد، بە تووندی ئەم هێرشە تیرویستیانە ئیدانە و شەرمەزار دەکەین، کە مەبەست لێدانە لە ژێرخانی ئابووری هەرێمی کوردستان و دروستکردنی مەترسییە لە سەر سەلامەتی کارمەندانی مەدەنی کەرتی وزە.
داوایشیکرد، هەموو لایەنە پەیوەندیدارەکان لە حکومەتی فیدراڵی و کۆمەڵگەی نێودەوڵەتی بە زووترین کات بێنە سەر خەت بۆ پاراستنی گیانی کارمەندانی مەدەنی و ئەمنیەتی وزە و رێگریکردن لە هێرشی دیکە بۆ سەر کەرتی وزەی کوردستان.
جەختیشیکردەوە، وەزارەتی سامانە سروشتییەکان هەموو هەوڵێکی خۆی بۆ پاراستنی گیانی کارمەندانی کەرتی وزە و پێگەی ستراتیجی خۆی لە دابینکردنی سەقامگیری وزە لە ناوچەکە و جیهان دەدات.
