مەسعود پزیشکیان، سەرۆک کۆماری ئێران بە رەسمی ئاژانسی نێودەوڵەتیی وزەی ئەتۆمی ئاگادارکردەوە، کە وڵاتەکەی کارکردن لەگەڵیان رادەگرێت.
بەپێی راپۆرتی ئاژانسی هەواڵیی مێهری ئێران، پزیشکیان لە نووسراوێکی رەسمیدا، ئاژانسی نێودەوڵەتیی وزەی ئەتۆمی ئاگادارکردووەتەوە، کە حکومەتی ئێران لەمەودوا کار بەو یاسایە دەکات، کە پابەندی دەکات بە راگرتنی کارکردن لەگەڵ ئاژانسەکە.
ئەو یاسایەی سەرۆک کۆماری ئێران ئاماژەی پێکردووە، لەسەر بنەمای بڕگەکانی 123 و 85ـی دەستووری ئێران دامەزراوە، کە لە دانیشتنی ئەنجومەنی شوورای ئیسلامیی ئێران، لە رۆژی چوارشەممەی رابردوودا پەسەندکرا.
بەپێی ئەم یاسایە، حکومەت پابەندە بە راگرتنی کارکردن لەگەڵ ئاژانسی نێودەوڵەتیی وزەی ئەتۆم، تا ئەو کاتەی ئاژانسەکە، مەرجەکانی ئێران جێبەجێدەکات.
رۆژی 21ـی 6ـی 2025، تەلەفیزیۆنی رەسمیی ئێران رایگەیاند، تاران سکاڵای لەسەر رافایێڵ گرۆسی، بەڕێوەبەری گشتیی ئاژانسی نێودەوڵەتیی وزەی ئەتۆم تۆمارکرد، بەهۆی ئەوەی “بەرامبەر بە چالاکییە ئەتۆمییە ئاشتیخوازەکانی ئێران، لایەنگیریی ئیسرائیلی کردووە”.
