بزوتنەوەی تاڵیبان دەستووری سەردەمی محەمەد زاهیر شا پەسەنددەکات و كاریپێدەكات، كە مێژووەكەی بۆ ساڵی 1964 دەگەڕێتەوە.
بەپێی هەواڵێكی ئاژانسی ڕۆیتەرز، مەولەوی عەبدولحەکیم شەراعی وەزیری دادی حکومەتەكەی تاڵیبان ڕایگەیاندووە، ئەوان پلانیان هەیە لە ماوەیەكی کورتخایەنی داهاتوودا دەستوورێک پێشکەش بکەن.
باسی لەوەشكردووە، “تاوەكو نووسینەوەی دەستوورە نوێكە، ئیمارەتی ئیسلامی دەستووری سەردەمی محەمەد زاهیر شا-ی پێشوو پەسەند دەکات، كە مێژووەكەی بۆ ساڵی 1964 دەگەڕێتەوە”.
بەڵام جەختیكردووەتەوە، هەر شتێک لەنێو دەستوورەكەدا لەگەڵ یاسای شەریعەت و بنەماکانی ئیمارەتی ئیسلامی یەکنەگرێتەوە، لایدەبەن.
نزیکەی 60 ساڵ لەمەوبەر دەستووری وڵات لە ئەفغانستان لەسەر بنەمای پاشایەتی دارێژرابوو، تاڵیبانیش بەنیازە كاریپێبكات، تا ئەو كاتەی دەستوورێكی نوێ دەنووسنەوە.
