زانایانی بەریتانیا هۆشداری دەدەن لە خێرایی بڵاوبوونەوەی جۆرە نوێیەکەی ڤایرۆسی کۆرۆنا و دەڵێن، لەم هاوینەدا ئەگەری هەیە خێرایی بڵاوبوونەوەکەی زیاترببێت.
بەپێی داتاکانی دەزگای تەندروستیی بەریتانیا، رێژەی ئەو کەسانەی کە پشکنینی ڤایرۆسی کۆرۆنایان پۆزەتیڤە (تووشبوون)، لەمساڵدا بۆ بەرزترین ئاست بەرزبووەتەوە، کە ئێستا رێژەکەی %97 زیاترە لەو ئاستەی کە لە مانگی ئازاردا تۆمارکرابوو.
پسپۆڕانی تەندروستیی بەریتانیا ئاماژە بەوەدەکەن، لەم شەپۆلە نوێیەدا، مەترسیی کەمتر لەسەر ژیانی هاوڵاتییان دروستدەبێت، بەوپێیەی لەو شەپۆلەی کە ساڵی 2020 سەرانسەری جیهانی گرتەوە، ژمارەیەکی زۆر تووشبوو هەبوون؛ ئەو تووشبووانەش لەئێستادا، لەڕووی بەرگریی جەستەییەوە ئامادەترن بەراورد بەوکاتە.
لە ماوەی رابردوودا، لە ئوسترالیا و بەشێکی وڵاتانی باشووری ئاسیا، ڤایرۆسی کۆرۆنا بەشێوەیەکی بەرچاو تەشەنەیسەند و تەندروستیی ئەو وڵاتانە داوایان لە هاوڵاتییانیان کرد، رێنماییە خۆپارێزییەکان جێبەجێبکەن.
رۆژی 1ـی حوزەیرانی ئەمساڵ، د. هێرش سەید سەلیم، جێگری بەڕێوەبەری تەندروستیی سلێمانی بە تۆڕی میدیایی ئێستای راگەیاند، “حاڵەتی کۆرۆنا لە هەرێمی کوردستان زۆرە و زۆرینەی ئەو کەسانەی ئێستا تووشی پەتا دەبن، لە راستیدا تووشی کۆرۆنا بوون”.
وتیشی، بەهۆی بوونی دەرمان و چارەسەری پێویست، لەئێستادا کۆرۆنا وەک پێشتر ئەو مەترسییەی نەماوە، بەڵام بۆ کەسانی بەتەمەن و پەککەوتە، وەک هەموو نەخۆشییەکانی دیکە، مەترسی دروستدەکات.
