223 خێزانی عێراقی کەمپی هۆلیان لە پارێزگای حەسەکەی سوریا بەجێهێشت و بەرەو عێراق بەڕێکەوتن.
شوکری حەجی، سەرۆکی فەرمانگەی دەرچوون لە کەمپی هۆل رایگەیاند، “ئەمە 11ـیەمین بەشی خێزانە عێراقییەکانی کەمپی هۆلە، کە لە سەرەتای ساڵی 2025ـەوە کەمپەکەیان بەجێهێشتووە”.
وتیشی، ئەو 223 خێزانە، پێکهاتوون لە 832 تاک و پاش بەجێهێشتنی کەمپی هۆل، دەگەڕێنەوە زێدی خۆیان لە عێراق.
ئاماژەی بەوەشدا، ئەو خێزانانە بە زیاتر لە 20 پاس، لە رێگەی دەروازەی سنووریی یەعروبییەوە لە رۆژهەڵاتی حەسەکە، دەگوازرێنەوە بۆ عێراق.
کەمپی هۆل، بە کەمپی کەسوکاری چەکدارانی داعش ناسراوە، دەکەوێتە باشوورى رۆژهەڵاتى شارى حەسەکەى رۆژئاواى کوردستان؛ کەسوکاری چەکدارانی داعش دوای گەڕاندنەوەیان، لە کەمپەکانی جەدعە لە موسڵ دەهێڵدرێنەوە، دواتر تێکەڵ بە کەسوکار و کۆمەڵگە خۆجێیەکانی خۆیان دەکرێنەوە.
