وتەبێژی وەزارەتی کشتوکاڵی هەرێم رایدەگەیەنێت، “زۆرینەی نیشانەکانی وشکەساڵی دەرکەوتوون”.
هیوا عەلی، وتەبێژی وەزارەتی کشتوکاڵ و سەرچاوەئاوییەکانی هەرێم، رایگەیاند، “وشکەساڵیی سەرتاسەریمان نەبووە، بەڵام زۆربەی نیشانەکانی دەرکەوتوون، بەجۆرێک کە نیوەی بەرهەمی دانەوێڵە سەوز نەبووە، ئاوی ژێر زەوی، بەنداوەکان کەمیکردووە و بەشێک لە کانییەکان وشک بوون، ئەمانە گرنگترین ئەو نیشانانەن کە دەرکەوتوون”.
وتیشی، “ئەو بارانەی لە ماوەی رابردوو باری، هیچ سوودێکی بۆ بەرهەمی کشتوکاڵ و دانەوێڵەکان نەبوو، چونکە ئێستا کاتی دروێنەیانە”.
باسی لەوەشکرد، “پێداچوونەوە بە بەرنامەی خاک و ئاودا دەکەین، ژمارەی بەنداوەکان زیاد دەکەین، لەگەڵ ئەوەشدا لەبارەی بەکارهێنانی ئاو هۆشداریی زیاتر بە هاوڵاتییان و جوتیاران دەدرێت، بۆ سیستمی دڵۆپاندن، رێگەی کشتوکاڵی زیرەک بەکاردەهێنین”.
