ماوەی دوو رۆژە هەواڵی گیانلەدەستدانی دوو خوێندکاری کۆلێژی سەربازیی ناسریە و برینداربوونی ژمارەیەکی دیکەیان بووەتە باسی میدیا عێراقییەکان و کاردانەوەی توندیشی لێکەوتەوە.
چیرۆکی رووداوەکە بۆ 18 ی ئەم مانگە دەگەڕێتەوە، کاتێک لەناو کۆلێژی سەربازیی چوارەمی ناسریە، بەرپرسانی کۆلێژەکە سەرقاڵی هەڵسەنگاندن و پۆلێنکردنی خوێندکارەکان بوون ژمارەیەک خوێندکار کە ژمارەیان لەنێوان 9-12 خوێندکاردا دەبێت و دۆخی تەندروستییان تێکدەچێت و دەگەیەندرێنە نەخۆشخانە.
رەزوان عەبدولکەریم و حسێن عیسام دوو لەو خوێندکارانە بوون بەهۆی خراپی دۆخی تەندروستییان گیانیان لەدەستدا.
یەکێک لە ئەندامانی خێزانەکەی رەزوان کەریم بە میدیا عێراقییەکان راگەیاند، “لە کاتژمێر 6:00 ی بەیانی تا 6:00 ی ئێوارە خوێندکارەکان لەبەردەم تیشکی خۆر راهێنانی قورسیان پێکراوە و رێگایان پێنەدراوە قومێکیش ئاو بخۆنەوە.
کەسوکارەکەی حسێن عیسامیش ئاشکرایانکردووە، رۆژێک دوای رووداوەکە ئاگادارکراونەتەوە، کاتێک کوڕەکەیان لە نەخۆشخانە بینیوە ئاسەواری برین بە دەستییەوە بووە، تووشی لەکارکەوتنی دڵ و گورچیلە بووەتەوە.
لەسەر رووداوەکە محەمەد شیاع سودانی سەرۆک وەزیرانی عێراق رایگەیاند، بەهۆی رووداوەکەوە هەریەکە لە سەرۆکی کۆلێژەکە و یاریدەدەرەکەی و راگری کۆلێژەکە و ئامرفەوجی کۆلێژەکە لە کارەکانیان دوورخراونەتەوە و پلەی مولازمیش دەبەخشێتە هەردوو خوێندکارە کۆچکردووەکە.
