لوقمان عەبدولقادر، سەرۆکی کۆمەڵەی قوربانیانی کیمابارانی هەڵەبجە رایگەیاند، لە هەرێمی کوردستان 808 کەس وەک بەرکەوتەی چەکی کیمیایی تۆمارکراون، وتیشی، “داوا لە حکومەتی عێراق و حکومەتی هەرێمی کوردستان دەکەن زیاتر لە خەمی چارەسەرکردنی بەرکەوتوانی چەکی کیمیاییدا بن”.
لوقمان عەبدولقادرلە لێدوانێکی تایبەتدا بۆ تۆڕی میدیایی ئێستا ئاماژەی بەوەشکرد، بەرکەوتوانی چەکی کیمیایی بەدەرلەوەی قوربانین، هاوکات ناسنامەی نەتەوەیەکیشن، کە بەخواستی خۆیان تووشی ئەم کارەساتە نەبوون.
باسی لەوەشکرد، لە هەموو وڵاتانی جیهان بابەتی بەرکەوتوانی چەکی کیمیایی لە ئاستی باڵادا، لەلایەن ئەنجومەنی وەزیران و سەرۆکایەتیی وڵاتەکەوە یادیان دەکرێتەوە، دەبوایە ئەمرۆش لە پایتەختی هەرێمی کوردستان بە ئامادەبوونی کونسڵی وڵاتان یادەکە بەرز رابگیرایە، بەڵام نەکرا.
ئەمە لەکاتێکدایە لە رۆژی 30ی 11ی هەموو ساڵێک، بە رۆژی رێزگرتن لە بەرکەوتوانی چەکی کیمیایی دادەنرێت، هەرێمی کوردستانیش خاوەنی زیاتر لە سەدان بەرکەوتەی چەکی کیمیاییە.
